ພາສາລາ​ວ
返回

ຂ່າວເດັ່ນ

首页

A+ A A-

返回

ການພົບປະທີ່ບໍ່ເປັນທາງການຄັ້ງທີ 2 ຂອງຜູ້ນຳຈີນ-ອິນເດຍໄດ້ຮັບໝາກຜົນອຸດົມສົມບູນ

2019-10-13 14:49:43

ຕາມຂ່າວ CRI: ວັນທີ 11 ຫາວັນທີ 12 ຕຸລານີ້, ທ່ານສີຈິ້ນຜິງ ປະທານປະເທດຈີນແລະທ່ານນາເຣັນດຮາ ໂມດີ ນາຍົກລັດຖະມົນຕີອິນເດຍໄດ້ຈັດການພົບປະທີ່ບໍ່ເປັນທາງການຄັ້ງທີ 2 ຢູ່ນະຄອນເຊັນນາຍຂອງອິນເດຍ. ຫລັງການພົບປະ, ທ່ານໂລຈ້າວຮຸ່ຍ, ຮອງລັດຖະມົນຕີກະຊວງການຕ່າງປະເທດຈີນໄດ້ແຈ້ງສະພາບການພົບປະໃຫ້ສື່ມວນຊົນຊາບ.

ທ່ານໂລຈ້າວຮຸ່ຍກ່າວວ່າ: ຜູ້ນຳສອງປະເທດໄດ້ກ່າວຢ້ຳຄວາມຮັບຮູ້ທີ່ເປັນເອກະພາບກັນທີ່ຕົກລົງໃນການພົບປະຢ່າງບໍ່ເປັນທາງການຄັ້ງທຳອິດທີ່ຈັດຂຶ້ນຢູ່ນະຄອນອູຮັ້ນແຂວງຫູເປຈີນໃນເດືອນເມສາປີ 2018, ເຊິ່ງກໍ່ຄືຈີນແລະອິນເດຍຕ່າງຊ່ວຍຊູຍູ້ໜູນກັນໃນການພັດທະນາເຊິ່ງກັນແລະກັນ, ແມ່ນປັດໄຈໝັ້ນທ່ຽງໃນສະຖານະການສາກົນໃນປັດຈຸບັນ.

ສອງຝ່າຍລ້ວນແຕ່ເຫັນວ່າ, ຄວນສະໜັບສະໜູນແລະເພີ່ມທະວີລະບົບການຄ້າຫຼາຍຝ່າຍບົນພື້ນຖານກະຕິກາໃນປັດຈຸບັນ. ຈີນ-ອິນເດຍຈະສືບຕໍ່ຊຸກຍູ້ໃຫ້ບັນລຸການຄ້າແບບເປີດປະຕູ ແລະກວມລວມ, ໃຫ້ທຸກປະເທດໄດ້ຮັບຜົນປະໂຫຍດນຳກັນ.

ຜູ້ນຳສອງທ່ານເຫັນວ່າ, ສອງປະເທດຄວນສຸມໃສ່ການໂຈມຕີລັດທິກໍ່ການຮ້າຍທຸກຮູບແບບ, ຮຽກຮ້ອງໃຫ້ບັນດາປະເທດເພີ່ມທະວີການຮ່ວມມືເພື່ອຕ້ານການກໍ່ການຮ້າຍ.

ຜູ້ນຳສອງປະເທດລ້ວນແຕ່ເຫັນວ່າ, ຈີນແລະອິນເດຍຄວນເພີ່ມທະວີການສົນທະນາກັນ, ໃຫ້ປະຊາຊົນສອງປະເທດເພີ່ມຄວາມເຂົ້າໃຈຕໍ່ວັດທະນະທຳເຊິ່ງກັນແລະກັນ. ສອງຝ່າຍຄວນຮ່ວມກັນຊຸກຍູ້ການສົນທະນາແລະຄວາມເຂົ້າໃຈລະຫວ່າງວັດທະນະທຳແລະອາລະຍະທຳທີ່ຕ່າງກັນ.

ຜູ້ນຳສອງປະເທດໄດ້ຢືນຢັນວ່າ ສະພາບແວດລ້ອມທີ່ໄຂປະຕູສູ່ພາຍນອກ ການໂອບອ້ອມອາລີ, ຄວາມຈະເລີນຮຸ່ງເຮືອງແລະຄວາມໝັ້ນຄົງ, ພ້ອມດ້ວຍການເຊື່ອມຈອດກັນທີ່ສົມບູນກວ່າເກົ່າມີຄວາມໝາຍສຳຄັນຕໍ່ຄວາມຈະເລີນຮຸ່ງເຮືອງແລະຄວາມໝັ້ນຄົງຂອງພາກພື້ນຕົນ. ຈີນຍິນດີຮ່ວມກັບອິນເດຍແລະປະເທດທີ່ກ່ຽວຂ້ອງຕັ້ງໜ້າຊຸກຍູ້ການຮ່ວມມືລະຫວ່າງຈີນ-ອິນເດຍ-ມຽນມາ-ບັງກາລະເດັດ.

ເພື່ອລົງເລິກການຮ່ວມມືເສດຖະກິດລະຫວ່າງສອງປະເທດຕື່ມອີກ, ຜູ້ນຳສອງປະເທດໄດ້ເຫັນດີຜ່ານການຄົ້ນຄວ້າສ້າງ “ການພົວພັນຄູ່ຮ່ວມດ້ານຂະແໜງການການຜະລິດ”, ສົ່ງເສີມສອງຝ່າຍລົງທຶນໃສ່ກັນໃນຂົງເຂດທີ່ມີກຳລັງບົ່ມຊ້ອນ, ແລະກຳນົດເຈົ້າໜ້າທີ່ທີ່ກ່ຽວຂ້ອງເພື່ອຊຸກຍູ້ໂຄງຄວາມຄິດດັ່ງກ່າວໃນກອງປະຊຸມກົນໄກສົນທະນາດ້ານເສດຖະກິດການຄ້າລະດັບສູງ.

ຜູ້ນຳທັງສອງທ່ານຍັງໄດ້ແລກປ່ຽນຄວາມຄິດຄວາມເຫັນກ່ຽວກັບບັນຫາຕ່າງໆທີ່ສອງຝ່າຍບໍ່ທັນຕົກລົງເຊັ່ນ: ບັນຫາຊາຍແດນ ແລະອື່ນໆ.